STENBOL - Rojnamegere Dîren Yurtsever ke semedê xebera xo ya, “Dewaya Kobanê de do îtîrafkarî bêrê goşdarîkerdiş” ameyîne muhakemekerdiş, a dewa ra beraet kerd. 

 

Rojnamegere Dîren Yurtsever wexto ke Midûra Karê Nuşteyê Ajansê Mezopotamyaye (MA) bî, semedê xeberanê bi sernameyê “Îdianameyê Dewa Kobanê de îfadeyê şahidan yê yewbînan nêgînê” û “Dewaya Kobanê de do lîtîrafkarî bêrê goşdarîkerdiş” bi îdiayê “Nasnameyê ajanan eşkera kerda û weşan kerda” dewa ci rê amebî akerdiş. Roniştişê ewilî yê dewaya Dîren Yurtsevere 23ine Dadgeha Cezaya Giran ya Edliyeyê Stenbolî de ame kerdiş. Dîren Yurtsever û avûkatê aye Sercan Korkmaz û avûkata Komeleya Rojnamegeranê Cinîyan ê Mezopotamyaye (MKG) Şûle Recepoglû roniştiş de hazir bî. 

 

Roniştiş, bi tespîtkerdişê nasnameyan dest pêkerd. Dima cû zî Dîren Yurtsevere pawitişê xo kerd û va: “Dewaya Kobanê raya pêroyî rê akerde amî kerdiş. Semedê taqîbkerdişê dewa, vernîya rojnamegeran de tu astengî çinbî. Tirkîya de pêro rojnamegerî, sîyasetmedarî, heyetê mîyanneteweyî zî dewa taqîb kerdî. Mûxabîrê ajansê ma zî dewa taqîb kerdêne û xebere goreyê zabitnameyî hazir kerdêne. Çîyo ke ma kerdo, karê rojnamegerîye bî û ma dewa taqîb kerd. Ma bi tu hawayî kesêk hedef nêmojnayo ra.”

 

Avûkatan zî pawitiş kerd û dimayê pawitişan, dozgerî mutalaayê xo pêşkeş kerd û waşt Dîren Yurtsevere bêro cezakerdiş. 

 

Dadgehe, bi sebebo ke hêmayê sûcî yê madî nêvirazîyayê, qerarê beraetî da.