ANQARA - Cinîyê ke şîyî şînê Endamê Heyetê Îmraliyî Sirri Sureya Onder, dîyar kerdî ke têkoşînê aştîye cayo ke verdayo, dewam bikerê.

 

Endamê Heyetê Îmraliyî yê Partîya Têduştî û Demokrasî (DEM Partî) Sirri Sureyya Onder 3yê gulane de nêweşxane de ameyîne dermankerdiş, dinyaya xo bedelnaye. DEM Partî semedê Sirri Sureyya Onder pêro merkez û qezayan de şîn dayî ro. Cinîyê ke şîyî şînê rêxistina DEM Partî ya Anqarayî, dîyar kerdî ke do têkoşînê aştîye yê Sirri Sureyya Onder pîl bikerê.

 

Do têkoşîn dewam bikerê

 

Endama Heqê Merdiman Sevîl Turgut wina va: “Ma zaf xemgîn ê. Wa sereyê pêro şarê Tirkîya sax bo. Mîsyonêk pîl yê Sirri Sureyya Onder nê welatî de estbî. Hesretê ey yê welatêk mîyanê aştî, aramî de estbî. Pêwa pêro hêrişê şîdetî, pêwa pêro şertê zîndanî ey dest têkoşînê aştîye ra vera nêdê. No sey wezîfeyêk ê ser de mend. Ma zaf xemgîn ê. Milêk ma şikîya. Zerrîya ma de vengîyêk pîl awan kerd. Ma do têkoşînê Sirri cayê verdayê de dewam bikerê. Ma do wezîfeyê xo bica bîyarê.”

 

‘Ganî ma têkoşîn pîlêr bikerê’

 

Endama Koordînasyonê Cinîyan ê DEM Partîye Alaz Gulveren, dîyar kerd ke prosesêk tarîxî de derbaz benê û va: “Sirri semedê ma zaf bierj bi. Cuya xo da têkoşîn ser. Nê rayîrî de merd. Ma prosesêk tarîxî ra derbaz benê. Sozê ma semedê Sirri Sureya Onder est o. Ganî ma têkoşînê ey dewam bikerê. Ganî cinî têkoşîn berz bikerê. Wayîrvejîyayîşê Sirri wayîrvejîyayîşê aştîye yo. Ma do semedê pêro kesê ke semedê aştîye dinyaya xo bedelnayê û semedê Sirri têkoşînê xo dewam bikerê.”

 

Waştişê ey aştî bî

 

Gulîstan Ozbek zî wina va: “Wa cayê ey cenet bo. Ma zaf xemgîn bî. Merdimêk bi erj bi. Birayê kurdan bi, dostê kurdan bi. O bi xo Tirkmen bi la dostê ma bi. Merdimêk baş bi. Sereyê keyeyê ey sax bo. Semedê ma muhîm bi. Wa cayê ey cenet bo. A aştîyêke ê waştêne do pê bêro. Do qetî aştî bîyaro.”