MERKEZÊ XEBERAN - Hemverê ablûqakerdişê hukmatê Iraqî yê serê kampa Şehîd Rustem Cûdî yê Mexmûrî û tepiştişê welatijê kampe, çadire çalakîya ya şarê kampe roja diyîn de yo.

 

Şarê Wargehê Multecîyan ê Şehîd Rûstem Cûdî (Mexmûr) hemverê ambargo, ablûqakerdişê wergehî ser, ancî tepiştişê heyetê nameyê şarî ser şîbî pêvînayîş, vizêrî heta verê berê nuqteya kontrolê hêzê Iraqî rayîr ra şîbî, tîya eşkerayîyêke dabî û helwestê xo ardî bî ziman.

 

Serê helwestê şarî, selahîyetdarê Iraqî neql kerdibî ke do endamê heyetê şîbî pêvînayîş, vera bidê la selahîyetdaran sozê xo ca nêard. Na çarçewa de semedo ke endamê heyetî nêameyî veradayîş, verê nuqteya artêşa Iraqî çadire amî ronayîş.

 

Çalakîya şarê Mexmûrî vizêrî şan de dewam kerd, welatijan heta serê sibayî tavistişê adirî ver de deyîran vatî. Ewro çalakîya şarê Mexmûrî roja xo ya diyîne de ya, bi qerardarîyêk xurt dewam kerd.

 

Ercê vatişî yo ke 10ê nîsane ra hukmatê Iraqî ambargo dayo wargehî ser, rayîr nêdano kelûpelê awanî, binesazgehî û ancî rayîr nêdano ke karkerî şêrê Bexda kar. Sewbîna Iraq nasnameyê şarê wargehe newe nêkeno û rayîr nêdano nêweşî zî şêrê nêweşxane.