ANQARA - Wendekarê ANKA-DER’î dîyar kerd ke ganî ziwanê kurdî bibo wayîrê statu û wina vatî: “Ziwan tena hacetê têkilîyan nîyo. Her çî yo; kultur, huner û cuye bi xo yo.”

 

Wendekarê Komeleya Ziwan Kultur û Hunerî yê Anka (ANKA-DER) bi wesîleya 15ê Gulane Roja Roşanê Ziwanê Kurdkî qisey kerdî û dîyar kerdî ke ganî peynîya polîtîkayê asîmîlasyonî û qedexeyan bêro û waştişê perwerdeyê bi ziwanê dayîke kerdî.

 

Ganî wendekarî bi ziwanê xo perwerde bivînê

 

Fatma Surucu ke ANKA-DER’î de perwerde vînena wina va: “Ziwanzan Mîr Celadet Alî Bedirxan û hevalê xo bi tîpê latîni kovara Hawarî vetê. Nê semedî ra na roje sey Roşanê Ziwanê Kurdkî ame îlankerdiş. Kovara Hawarî de qêrînêk est o, no qêrîn semedê ziwanê kurdkî yo. Nê semedî ra ganî ziwanê ma vînî nêbo. Ganî bibo ziwanê fermî û perwerdeyî. Wa mekteban de bibo ziwanê perwerde. Wa wendekarî bi ziwanê xo perwerde bigîrê. Ziwan tena hacetê têkiliyan nîyo, her çî yo, kultur, huner û cuye bi xo yo. Ganî îmkanî bêrê dayîş.”

 

Ganî ma lehçeya zazakî bidê ciwîyayîş

 

Fatma Surucu dewamê qiseykerdişê xo de bale ant serê lehçeya zazakî û va: “Goreyê UNESCO’yî 1500 ziwanî çin benê. Tirkîya de dî lehçeya zazakî ya kurdkî binê tehluke de ya. Ganî ma wayîrê ci vejîyê û bifê ciwîyayîş. Wa dayîkî tutanê xo dir kurdkî qisey bikerê. Ganî kurdkî bêro averşîyayîş.”

 

‘Hawar’ destpêkêk muhîm o

 

Yeter Çevîk dîyar kerd ke ziwan awankerdişê kultur û hunerî de muhîm o û wina va: “Ez roşanê ziwanê kurdî pîroz kena. Semedê kurdan rojêke muhîm a. Rojêk taybet û tarîxî ya. Mîr Celadet Bedirxan û hevalê xo bi tîpê latîni kovarêke vetî. Na kovare Hawar a. Hawar destpêkêk muhîm a. Semedê kurdan bîya dibistan. Nê semedî ra na roje sey roşan ameya qebûlkerdiş.”

 

‘Ziwanêk çinbo merdimayî çin beno’

 

Yeter Çevîk tewr peyîn wina va: “Ziwan çira muhîm o? Ziwanê ma se serre yo yeno asîmîlekerdiş. Bi poîtîkayan ameyo qedexekerdiş. Ziwan erjê merdimayî yo. Ziwan çinbo, merdimayî çin beno. Ziwan semedê pêro şaran lazimî yo. Ma hemverê tu ziwanî nîyê. Çi ziwan beno wa bibo, wa biciwîyo. Ganî her kes ziwanê xo bimuso û bi ziwanê xo biwano û perwerde bigîro.”